O robot móbil
Presentámosvos a Pioneer 3DX, que é o robot móbil co que imos e ides traballar no ObradoiroBot.
Este robot é quen de se orientar e localizar, para saber onde está en cada momento nun espazo. Ademáis pode moverse esquivando paredes e obstáculos, guiado por Intelixencia Artificial. Tamén é capaz de aprender a partir da experiencia e pouco a pouco ir mellorando os seus comportamentos, movéndose mellor e mais rápido. A intelixencia artificial permítelle facer percorridos cada vez mais parecidos ás que faríamos cada un de nos: cruzando portas, planificando traxectorias dun punto a outro, evitando as colisións, ... iso sí, non penses que é un robot ultrarrápido. Móvese a unha velocidade máxima de 1,6 m/s, que en km/h veñen sendo...¡seguro que ti o podes calcular exactamente!
Para localizarse e detectar os obstáculos, o Pioneer 3DX ten un sensor láser e un anel de 16 sensores de ultrasons, mediante os que recolle información do seu contorno, coma se fosen radares ou os ecos dos morcegos. E esta vai ser a información de que ides dispor para guialo na gimcana sen colisionar cos valados que delimitan o percorrido. El é capaz de facelo... ¿e ti?